Ano ba! Pwede namang mangampanya nang walang ginagamit na kahit sino, patay o buhay, di ba?

Kinikilabutan ako pag napapanood ko si Noynoy habang ginagamit ang pagkamatay ng Tatay at Nanay nya para lang makakuha ng simpatya sa mga botante. Alam ba nyang panggagamit ang ginagawa nya? Patahimikin na kaya nya ang mga kaluluwa ng mga magulang nya? Kung meron man syang kakayahang magpatakbo ng Pilipinas, e di sabihin nya kung paano nya gagawin dahil hindi na sya matutulungan ng Mama at Papa nya pag nakapwesto na sya.

Isa pa itong si Manny Villar. Nung una kong madinig sa radio yung tanong nya kung namatayan ka na ba ng kapatid, sumakit ang ulo ko. Tapos ngayon, puro mga bata na naman ang ginamit nya para kumanta sa commercial nya. Kung ako ang tatanungin, child exploitation yan e. Sige nga Villar, pag-aralin mo hanggang makatapos ng college lahat ng batang ginamit mo sa commercial! Game!

Ano ba ang kinalaman ng mga namatay na kamag-anak sa gustong mangyari ni Noynoy at Villar? Mabubuhay ba uli ang mga namatay pag naging presidente sila? Hindi nga!

Mabuti pa ang LBC. Bumawi sila sa huli nilang commercial na nagturo ng maling spelling. Ngayon, tinuturo nila uli ang Panatang Makabayan sa commercial nila. Aaminin ko, medyo sumasablay na ako pag nire-recite ko yun. Sinubukan kong sabayan yung commercial ng LBC, pero sumasabit ako.

Dapat may mga ganitong commercial ang mga private companies e. Lalo na yung tamang pace ng pagkanta ng Lupang Hinirang.

At dapat din tantanan na ni Noynoy at Villar ang panggagamit nila sa ibang tao, lalo na ang mga namatay nilang kamag-anak. Yung mga buhay ang atupagin ninyo!